جب کعبہ کے قریب پہنچیں تو فوراً تلبیہ پڑھنا بند کر دیں۔ حجرِ اسود کے پاس جانے کے بعد اس کی طرف رخ کریں، اگر ممکن ہو تو اسے دائیں ہاتھ سے چھوئیں اور بوسہ دیں، بھیڑ لگا کر لوگوں کو تکلیف نہ دیں۔ حجرِ اسود کو چھوتے وقت کہیں:
بِسْمِ اللهِ، وَاللهُ أَكْبَرُ
(بسم اللہ واللہ اکبر)
یا کہیں:
اللهُ أَكْبَرُ
(اللہ اکبر)
اگر حجرِ اسود کو بوسہ دینا دشوار ہو تو ہاتھ یا چھڑی سے چھونے کے بعد، جس چیز سے اسے چھوا ہے اسے بوسہ دیں، اور اگر چھونا بھی دشوار ہو تو حجرِ اسود کی طرف اشارہ کرکے کہیں:
اللهُ أَكْبَرُ
(اللہ اکبر)
البتہ اس حالت میں ہاتھ یا جس چیز سے اشارہ کیا ہے اسے بوسہ نہ دیں۔
یاد رکھیں، طواف کے صحیح ہونے کے لیے شرط یہ ہے کہ ہر قسم کی چھوٹی اور بڑی ناپاکی سے پاک ہوں؛ کیونکہ طواف نماز کی مانند ہے، صرف طواف کے دوران بات کرنے کی اجازت ہے۔
۵. طواف کرتے وقت اللہ کے گھر کعبہ کو اپنی بائیں جانب رکھیں اور کعبہ کے گرد سات چکر طواف کریں۔ جب رکنِ یمانی کے پاس پہنچیں تو اگر ممکن ہو اسے دائیں ہاتھ سے چھوئیں، لیکن رکنِ یمانی کو بوسہ نہ دیں۔ اگر رکنِ یمانی کو چھونا ممکن نہ ہو تو اسے چھوڑ کر آگے بڑھ جائیں اور طواف جاری رکھیں، کسی قسم کا اشارہ نہ کریں اور نہ تکبیر کہیں؛ کیونکہ رسول اللہ صلی اللہ علیہ وسلم سے ایسا منقول نہیں ہے۔ لیکن جب بھی حجرِ اسود کے پاس پہنچیں تو اسے چھوئیں، بوسہ دیں اور تکبیر کہیں، جیسا کہ پہلے بیان ہوا ہے۔ اگر چھونا ممکن نہ ہو تو اس کی طرف اشارہ کریں اور تکبیر کہیں۔
اس طواف میں مردوں کے لیے اضطباع کرنا سنت ہے، یعنی اوپر والی چادر کا درمیانی حصہ دائیں بغل کے نیچے سے گزار کر اس کے دونوں سروں کو بائیں کندھے پر رکھنا۔ طواف کے پہلے تین چکروں میں رمل کرنا بھی مردوں کے لیے سنت ہے۔ رمل سے مراد چھوٹے چھوٹے قدموں کے ساتھ تیز چلنا ہے۔
طواف کے دوران کوئی مخصوص دعا یا ذکر نہیں ہے، ہر چکر میں حسبِ خواہش شریعت کے مطابق ذکر اور دعا پڑھنا مستحب ہے۔ البتہ طواف کے ہر چکر میں رکنِ یمانی اور حجرِ اسود کے درمیان درج ذیل دعا پڑھنا سنت ہے:
﴿رَبَّنَآ ءَاتِنَا فِي ٱلدُّنۡيَا حَسَنَةٗ وَفِي ٱلۡأٓخِرَةِ حَسَنَةٗ وَقِنَا عَذَابَ ٱلنَّارِ ٢٠١﴾ [البقرة:201]
(رَبَّنَا آتِنَا فِی الدُّنْیَا حَسَنَةً وَفِی الْآخِرَةِ حَسَنَةً وَقِنَا عَذَابَ النَّار)
”اے ہمارے رب! ہمیں دنیا میں بھلائی عطا فرما اور آخرت میں بھی بھلائی عطا فرما، اور ہمیں جہنم کی آگ سے بچا۔“ [سورۃ البقرہ: ۲۰۱]
اگر ممکن ہو تو تکبیر کے ساتھ حجرِ اسود کو چھو کر اور بوسہ دے کر ساتواں چکر مکمل کریں، لیکن اگر ممکن نہ ہو تو پہلے کی طرح صرف اشارہ کرنا اور تکبیر کہنا کافی ہے۔
طواف مکمل کرنے کے بعد اوپر والی چادر اچھی طرح پہن لیں، یعنی کندھوں اور سینے کو کپڑے سے ڈھانپ لیں۔ اضطباع کی حالت میں نہ رہیں۔ پھر اگر ممکن ہو تو مقامِ ابراہیم کے پیچھے، خواہ کچھ فاصلے پر ہی، دو رکعت نماز پڑھیں۔ اگر یہ ممکن نہ ہو تو مسجد میں جہاں ممکن ہو وہیں نماز پڑھیں۔ پہلی رکعت میں سورۂ فاتحہ کے بعد قل يا أيها الكافرون (سورۂ کافرون) اور دوسری رکعت میں قل هو الله أحد (سورۂ اخلاص) پڑھنا افضل ہے۔ کوئی دوسری سورت پڑھنے میں بھی کوئی حرج نہیں۔ ان دو رکعتوں کے بعد اگر حجرِ اسود کو بوسہ دینا ممکن ہو تو ایسا کریں۔
۶. پھر نماز کے بعد زمزم کا پانی پی کر سعی کرنے کے لیے صفا پہاڑی کی طرف روانہ ہوں۔ (حدیث بی ڈی کی جانب سے اضافہ)
قرآن و سنت کی روشنی میں عمرہ کرنے کا طریقہ - ڈاکٹر ابو بکر محمد زکریا