حجِ مبرور کی جزا جنت کے سوا کچھ نہیں۔[1] جس شخص نے حج کیا، ایسے کاموں سے اجتناب کیا جن کی شریعت اجازت نہیں دیتی، اور جنسی تعلق پر مشتمل اعمال و اقوال سے باز رہا، وہ اس دن کی طرح پاک ہو کر لوٹا جس دن وہ اپنی ماں کے بطن سے پیدا ہوا تھا۔[2] عرفہ کے دن اللہ تعالیٰ اتنی کثیر تعداد میں لوگوں کو جہنم سے آزاد فرماتے ہیں جتنی کسی اور دن نہیں فرماتے۔ اس دن اللہ تعالیٰ قریب ہوتے ہیں، میدانِ عرفات میں وقوف کرنے والے حاجیوں پر فرشتوں کے سامنے فخر فرماتے ہیں اور کہتے ہیں: ’یہ لوگ کیا چاہتے ہیں؟‘[3]
ایک شخص نے رسول اللہ (ﷺ) سے پوچھا کہ سب سے افضل عمل کون سا ہے؟ آپ نے جواب دیا: ’یکتا اللہ پر ایمان، اور اس کے بعد حجِ مبرور، جو تمام اعمال سے اتنا افضل ہے جتنا سورج کے طلوع اور غروب کے درمیان فاصلہ ہے۔‘[4] ایک دوسری حدیث میں آیا ہے کہ رسول اللہ (ﷺ) سے پوچھا گیا: ’سب سے افضل عمل کون سا ہے؟‘ آپ نے جواب دیا: ’اللہ اور اس کے رسول پر ایمان۔‘ پوچھا گیا: ’اس کے بعد کیا؟‘ آپ نے فرمایا: ’اللہ کی راہ میں جہاد۔‘ پوچھا گیا: ’پھر کون سا؟‘ آپ نے فرمایا: ’حجِ مبرور۔‘[5] ایک مرتبہ عائشہ (رضی اللہ عنہا) نے رسول اللہ (ﷺ) سے عرض کیا: ’یا رسول اللہ! کیا ہم آپ لوگوں کے ساتھ جہاد اور غزوات میں نہ جائیں؟‘ آپ نے فرمایا: ’تمہارے لیے سب سے افضل اور بہترین جہاد حج، یعنی حجِ مبرور ہے۔‘[6] ’حج اور عمرہ کرنے والے اللہ کے وفد اور مہمان ہیں۔ اگر وہ اللہ کو پکارتے ہیں تو اللہ ان کی پکار قبول فرماتا ہے، اور اگر وہ گناہوں کی معافی مانگتے ہیں تو اللہ ان کے گناہ معاف فرما دیتا ہے۔‘[7] ابو ہریرہ سے مروی ایک حدیث میں آیا ہے کہ رسول اللہ (ﷺ) نے فرمایا: ’ایک عمرے سے دوسرے عمرے تک، ان دونوں کے درمیان ہونے والے گناہوں کا کفارہ ہے، اور حجِ مبرور کی جزا جنت کے سوا کچھ نہیں۔‘[8] ایک اور حدیث میں آیا ہے کہ رسول اللہ (ﷺ) نے فرمایا: ’کسی شخص کا اسلام قبول کرنا اس کے گزشتہ تمام گناہوں کو مٹا دیتا ہے، ہجرت اس سے پہلے کے تمام گناہوں کو مٹا دیتی ہے، اور حج اس سے پہلے کے تمام گناہوں کو مٹا دیتا ہے۔‘[9] ابن مسعود سے مروی ایک حدیث میں آیا ہے: ’تم پے در پے حج اور عمرہ ادا کرو، کیونکہ یہ دونوں فقر اور گناہوں کو اسی طرح دور کر دیتے ہیں جیسے لوہار کی دھونکنی لوہے، سونے اور چاندی کی میل کو دور کر دیتی ہے۔ اور حجِ مبرور کا ثواب جنت کے سوا کچھ نہیں۔‘[10]
مذکورہ بالا احادیث کا مفہوم بالکل واضح ہے۔ لہٰذا حج کا ارادہ رکھنے والے ہر شخص کو چاہیے کہ حجِ مقدس کے ان فضائل کو بھرپور طور پر حاصل کرنے کے لیے پوری جانفشانی سے کوشش کرتا رہے۔ حج کی قبولیت کی تمام شرائط پوری کرے، تمام گناہوں اور معاصی سے بچا رہے اور سختی کے ساتھ اپنے آپ پر قابو رکھے۔
---
[1] - والحج المبرور ليس له جزاء إلا الجنة (بخاری: حدیث نمبر ۱۶۵۰)
[2] - فلم يرفث ولم يفسق ، رجع كيوم ولدته أمه من حج لله (بخاری: حدیث نمبر ۱۴۲۴)
[3] - مسلم: ۲/۹۸۳
[4] - عن ماعز التميمي ু رضى الله عنه ু عن النبي صلى الله عليه وسلم : أنه سئل أي الأعمال أفضل ؟ قال : إيمان بالله وحده ، ثم حجة برة تفضل سائر الأعمال ، كما بين مطلع الشمس إلى مغربها (احمد: ۴/۳۴۲)
[5] - سئل رسول الله صلى الله عليه وسلم ، أي الأعمال أفضل ؟ قال : الإيمان بالله ورسوله ، قيل : ثم ماذا ؟ قال جهاد في سبيل الله ، قيل ثم ماذا ؟ قال حج مبرور (بخاری: ۱۴۲۲)
[6] - عن عائشة أم المؤمنين ু رضى الله عنها ু قالت : قلت يارسول الله ، ألا نغزو ونجاهد معكم ؟ قال : لَكُنَّ أفضل الجهاد وأجمله الحج ، حج مبرور (بخاری کی شرح فتح الباری: ۴/۱۸۶۱)
[7] - عن أبي هريرة رضى الله عنه ، أن رسول الله قال : الحجاج والعمار وفد الله ، إن دعوه أجابهم وان استغفروه غفر لهم ابن ماجہ: حدیث نمبر ۲۸۸۳)
[8] - عن أبي هريرة رضي الله عنه أن رسول الله صلى الله عليه وسلم قال : العمرة إلى العمرة كفارة لما بينهما ، والحج المبرور ليس له جزاء إلا الجنة ،، (بخاری: حدیث نمبر ۱۶۵۰)
[9] - إن الإسلام يهدم ما كان قبله ، و أن الهجرة تهدم ما كان قبلها ، وأن الحج يهدم ما كان قبله ،، (مسلم: حدیث نمبر ۱۷۳)
[10] - تابعوا بين الحج والعمرة ، فإنهما ينفيان الفقر والذنوب كما ينفي الكير خبث الحديد والذهب والفضة وليس للحج المبرور ثواب إلا الجنة (البانی: صحیح النسائی: ۲/۵۵۸)