حج اور عمرہ کی فضیلت
حج اور عمرہ کی فضیلت کے بارے میں بہت سی احادیث ہیں۔ ذیل میں ان میں سے بعض کا ذکر کیا جاتا ہے:
1. حج افضل ترین اعمال میں سے ایک ہے۔ ابو ہریرہ رضی اللہ عنہ سے روایت ہے: رسول اللہ صلی اللہ علیہ وسلم سے پوچھا گیا: کون سا عمل سب سے افضل ہے؟
«فَقَالَ إِيمَانٌ بِاللهِ وَرَسُولِهِ قِيلَ ثُمَّ مَاذَا قَالَ الْجِهَادُ فِي سَبِيلِ اللهِ قِيلَ ثُمَّ مَاذَا قَالَ حَجٌّ مَبْرُور».
آپ نے فرمایا: ’اللہ اور اس کے رسول پر ایمان لانا۔‘ پوچھا گیا: ’پھر کیا؟‘ آپ نے فرمایا: ’اللہ کی راہ میں جہاد کرنا۔‘ پوچھا گیا: ’پھر کون سا؟‘ آپ نے فرمایا: ’حجِ مقبول۔‘[1] ایک دوسری حدیث میں مروی ہے کہ ایک شخص نے رسول اللہ صلی اللہ علیہ وسلم سے پوچھا کہ سب سے افضل عمل کیا ہے؟ جواب میں آپ نے فرمایا:
«الإِيمَانُ بِاللَّهِ وَحْدَهُ، ثُمَّ الْجِهَادُ، ثُمَّ حَجَّةٌ بَرَّةٌ تَفْضُلُ سَائِرَ الْعَمَلِ كَمَا بَيْنَ مَطْلِعِ الشَّمْسِ إِلَى مَغْرِبِهَا».
’ایک اللہ پر ایمان؛ پھر حجِ مبرور، جو تمام اعمال سے افضل ہے؛ اس کی دوسرے اعمال پر فضیلت ایسی ہی ہے جیسے سورج کے طلوع اور غروب ہونے کے درمیان فرق۔‘[2]
2. گناہوں سے پاک حج کا بدلہ جنت ہے۔ ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:
«وَالْحَجُّ الْمَبْرُورُ لَيْسَ لَهُ جَزَاءٌ إِلاَّ الْجَنَّةُ».
’اور حجِ مبرور کا بدلہ جنت کے سوا کچھ نہیں۔‘[3]
3. رسول اللہ صلی اللہ علیہ وسلم نے حج کو جہاد قرار دیا ہے۔ عائشہ رضی اللہ عنہا سے روایت ہے، وہ بیان کرتی ہیں: ’اے اللہ کے رسول! جہاد کو تو سب سے افضل عمل سمجھا جاتا ہے، تو کیا ہم جہاد نہ کریں؟‘ آپ نے فرمایا:
«لَكُنَّ أَفْضَلَ الْجِهَادِ حَجٌّ مَبْرُورٌ».
’تمہارے لیے سب سے افضل جہاد حجِ مبرور ہے۔‘[4] ایک دوسری حدیث میں مروی ہے کہ عائشہ رضی اللہ عنہا نے عرض کیا: ’یا رسول اللہ! کیا ہم آپ لوگوں کے ساتھ جہاد اور مہمات میں نہ جائیں؟‘ آپ نے فرمایا:
«لَكُنَّ أَحْسَنُ الْجِهَادِ وَأَجْمَلُهُ الْحَجُّ حَجٌّ مَبْرُورٌ».
’تمہارے لیے بہتر اور سب سے خوب صورت جہاد حج، یعنی حجِ مبرور ہے۔‘[5] ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:
«جِهَادُ الْكَبِيرِ ، وَالصَّغِيرِ ، وَالضَّعِيفِ ، وَالْمَرْأَةِ : الْحَجُّ ، وَالْعُمْرَةُ».
’بوڑھے، نابالغ، کمزور اور عورت کا جہاد حج اور عمرہ ہے۔‘[6]
4. حج گناہوں کو مٹا دیتا ہے۔ ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:
«مَنْ حَجَّ لِلَّهِ فَلَمْ يَرْفُثْ وَلَمْ يَفْسُقْ رَجَعَ كَيَوْمِ وَلَدَتْهُ أُمُّهُ».
’جس نے اللہ کے لیے حج کیا، جنسی تعلق سے متعلق کاموں اور باتوں سے باز رہا اور ان کاموں سے اجتناب کیا جن کی شریعت اجازت نہیں دیتی، وہ اس دن کی طرح پاک ہو کر واپس لوٹا جس دن اس کی ماں نے اسے جنم دیا تھا۔‘[7]
اس حدیث کا مفہوم عمرو بن العاص رضی اللہ عنہ سے مروی حدیث سے مزید ثابت ہوتا ہے۔ رسول اللہ صلی اللہ علیہ وسلم نے ان سے فرمایا:
«أَمَا عَلِمْتَ أَنَّ الإِسْلاَمَ يَهْدِمُ مَا كَانَ قَبْلَهُ وَأَنَّ الْهِجْرَةَ تَهْدِمُ مَا كَانَ قَبْلَهَا وَأَنَّ الْحَجَّ يَهْدِمُ مَا كَانَ قَبْلَهُ».
’کیا تم نہیں جانتے کہ کسی شخص کا اسلام قبول کرنا اس کے گزشتہ تمام گناہوں کو مٹا دیتا ہے، ہجرت اس کے گزشتہ تمام گناہوں کو مٹا دیتی ہے اور حج اس کے گزشتہ تمام گناہوں کو مٹا دیتا ہے؟‘[8]
5. حج کی طرح عمرہ بھی گناہوں کو مٹا دیتا ہے۔ ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:
«مَنْ أَتَى هَذَا الْبَيْتَ فَلَمْ يَرْفُثْ وَلَمْ يَفْسُقْ رَجَعَ كَمَا وَلَدَتْهُ أُمُّهُ».
’جو شخص اس گھر میں آیا، پھر جنسی تعلق سے متعلق کاموں اور باتوں سے باز رہا اور خلافِ شریعت کاموں سے اجتناب کیا، وہ اس دن کی طرح (بے گناہ) ہو کر واپس لوٹا جس دن اس کی ماں نے اسے جنم دیا تھا۔‘ امام ابن حجر عسقلانی کے مطابق یہاں حج اور عمرہ کرنے والے دونوں مراد ہیں۔[9]
6. حج اور عمرہ گناہوں کو مٹانے کے ساتھ ساتھ حج اور عمرہ کرنے والوں کی محتاجی بھی دور کر دیتے ہیں۔ عبداللہ بن مسعود رضی اللہ عنہ سے روایت ہے، وہ بیان کرتے ہیں کہ رسول اللہ صلی اللہ علیہ وسلم نے فرمایا:
«تَابِعُوا بَيْنَ الْحَجِّ وَالْعُمْرَةِ، فَإِنَّهُمَا يَنْفِيَانِ الْفَقْرَ وَالذُّنُوبَ كَمَا يَنْفِي الْكِيرُ خَبَثَ الْحَدِيدِ، وَالذَّهَبِ وَالْفِضَّةِ».
’تم حج اور عمرہ یکے بعد دیگرے کرتے رہو، کیونکہ یہ دونوں محتاجی اور گناہوں کو اس طرح دور کر دیتے ہیں جیسے لوہار کی بھٹی لوہے، سونے اور چاندی کی میل کو دور کر دیتی ہے۔‘[10]
7. حج اور عمرہ ادا کرنے والے اللہ کے مہمان یا نمائندے ہیں۔ ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا:
«الْغَازِي فِي سَبِيلِ اللهِ ، وَالْحَاجُّ وَالْمُعْتَمِرُ ، وَفْدُ اللهِ ، دَعَاهُمْ ، فَأَجَابُوهُ ، وَسَأَلُوهُ ، فَأَعْطَاهُمْ».
’اللہ کی راہ میں جنگ کرنے والا، حج کرنے والا اور عمرہ کرنے والا اللہ کے مہمان یا نمائندے ہیں۔ اللہ نے انہیں بلایا تو انہوں نے اس کی پکار پر لبیک کہا، اور انہوں نے اس سے مانگا تو اس نے انہیں عطا فرمایا۔‘[11] ایک دوسری حدیث میں ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:
«الْحُجَّاجُ وَالْعُمَّارُ ، وَفْدُ اللهِ إِنْ دَعَوْهُ أَجَابَهُمْ ، وَإِنِ اسْتَغْفَرُوهُ غَفَرَ لَهُمْ».
’حج اور عمرہ ادا کرنے والے اللہ کے مہمان یا نمائندے ہیں۔ جب وہ اللہ کو پکارتے ہیں تو وہ ان کی دعا قبول فرماتا ہے، اور جب وہ اس سے مغفرت طلب کرتے ہیں تو وہ انہیں بخش دیتا ہے۔‘[12]
8. ایک عمرے سے دوسرے عمرے تک کے درمیانی گناہوں اور خطاؤں کا کفارہ ہو جاتا ہے۔ ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:
«الْعُمْرَةُ إِلَى الْعُمْرَةِ كَفَّارَةٌ لِمَا بَيْنَهُمَا».
’ایک عمرے سے دوسرے عمرے تک، ان دونوں کے درمیان جو کچھ (گناہ) ہو گا، وہ اس کے لیے کفارہ ہے۔‘[13]
9. حج کی نیت سے نکل کر وفات پا جانے والے کو بھی حج کا ثواب ملتا رہے گا۔ ابو ہریرہ رضی اللہ عنہ سے روایت ہے، وہ بیان کرتے ہیں کہ رسول اللہ صلی اللہ علیہ وسلم نے فرمایا:
«مَنْ خَرَجَ حَاجًّا فَمَاتَ كُتِبَ لَهُ أَجْرُ الْحَاجِّ إِلَى يَوْمِ الْقِيَامَةِ وَمَنْ خَرَجَ مُعْتَمِرًا فَمَاتَ كُتِبَ لَهُ أَجْرُ الْمُعْتَمِرِ إِلَى يَوْمِ الْقِيَامَةِ».
’جو شخص حج کے ارادے سے نکلا، پھر وفات پا گیا، اس کے لیے قیامت تک حج کا ثواب لکھا جاتا رہے گا۔ اور جو شخص عمرے کے ارادے سے نکلا اور وفات پا گیا، اس کے لیے قیامت تک عمرے کا ثواب لکھا جاتا رہے گا۔‘[14]
10. اللہ تعالیٰ نے رمضان کے مہینے میں عمرہ ادا کرنے کو بہت زیادہ فضیلت عطا کی ہے اور اسے رسول اللہ صلی اللہ علیہ وسلم کے ساتھ حج کرنے کے برابر ثواب سے نوازا ہے۔ ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا:
«فَإِنَّ عُمْرَةً فِي رَمَضَانَ تَقْضِي حَجَّةً أَوْ حَجَّةً مَعِي».
’یقیناً رمضان میں عمرہ کرنا حج کے برابر ہے، یا آپ نے فرمایا: میرے ساتھ حج کرنے کے برابر ہے۔‘[15]
11. بیت اللہ کے ارادے سے نکلنے پر ہر قدم کے بدلے نیکی لکھی جاتی ہے، گناہ معاف کیا جاتا ہے اور مرتبہ بلند کیا جاتا ہے۔ عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا:
«أَمَّا خُرُوجُكَ مِنْ بَيْتِكَ تَؤُمُّ الْبَيْتَ فَإِنَّ لَكَ بِكُلِّ وَطْأَةٍ تَطَأُهَا رَاحِلَتُكَ يَكْتُبُ اللَّهُ لَكَ بِهَا حَسَنَةً وَيَمْحُو عَنْكَ بِهَا سَيِّئَةً».
’جب تم بیت اللہ کے ارادے سے اپنے گھر سے نکلو گے تو تمہاری سواری کے ہر مرتبہ زمین پر پاؤں رکھنے اور پاؤں اٹھانے کے بدلے تمہارے لیے ایک نیکی لکھی جائے گی اور تمہارا ایک گناہ معاف کیا جائے گا۔‘[16]
انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:
«فَإِنَّكَ إِذَا خَرَجْتَ مِنْ بَيْتِكَ تَؤُمُّ الْبَيْتَ الْحَرَامِ ، لا تَضَعُ نَاقَتُكَ خُفًّا وَلا تَرْفَعُهُ إِلَّا كَتَبَ اللَّهُ لَكَ بِهِ حَسَنَةً ، وَحَطَّ عَنْكَ بِهِ خَطِيئَةً ، وَرَفَعَكَ دَرَجَةً»
’کیونکہ جب تم بیت اللہ کے ارادے سے اپنے گھر سے نکلو گے تو تمہاری اونٹنی کے ہر مرتبہ کھر رکھنے اور کھر اٹھانے کے ساتھ تمہارے لیے ایک نیکی لکھی جائے گی، تمہارا ایک گناہ معاف کیا جائے گا اور تمہارا مرتبہ بلند کیا جائے گا۔‘[17]
یہ بات یاد رکھنی چاہیے کہ یہ تمام فضیلتیں وہی شخص حاصل کرے گا جو صرف اللہ کو راضی کرنے کے لیے عمل کرے اور رسول اللہ صلی اللہ علیہ وسلم کی سنت کے مطابق حج و عمرہ ادا کرے۔ کسی بھی عمل کے اللہ کے ہاں قبول ہونے کے لیے دو شرطیں ہیں، جن کا پورا ہونا ضروری ہے۔
پہلی شرط: صرف اللہ کی رضا حاصل کرنے کے لیے عمل کرنا۔ رسول اللہ صلی اللہ علیہ وسلم نے فرمایا:
«إِنَّمَا الأَعْمَالُ بِالنِّيَّاتِ، وَإِنَّمَا لِكُلِّ امْرِئٍ مَا نَوَى»
’تمام اعمال کے نتائج نیتوں پر منحصر ہیں۔ ہر شخص کو وہی ملے گا جس کی اس نے نیت کی۔‘[18]
دوسری شرط: رسول اللہ صلی اللہ علیہ وسلم کی سنت کے مطابق ہونا، کیونکہ آپ نے فرمایا:
«مَنْ عَمِلَ عَمَلاً لَيْسَ عَلَيْهِ أَمْرُنَا فَهْوَ رَدٌّ».
’جس نے ایسا عمل کیا جس پر ہماری منظوری نہیں، وہ مردود ہے۔‘[19]
لہٰذا جس کا عمل صرف اللہ کو راضی کرنے کے لیے اور رسول اللہ صلی اللہ علیہ وسلم کی سنت کے مطابق ہو، اسی کا عمل اللہ کے ہاں قبول ہو گا۔ اس کے برعکس، جس کے عمل میں دونوں شرطیں یا ان میں سے کوئی ایک شرط موجود نہ ہو، اس کا عمل مردود ہو گا۔ ان کے اعمال کے بارے میں اللہ تعالیٰ فرماتا ہے:
﴿ وَقَدِمۡنَآ إِلَىٰ مَا عَمِلُواْ مِنۡ عَمَلٖ فَجَعَلۡنَٰهُ هَبَآءٗ مَّنثُورًا ٢٣ ﴾ [الفرقان: ٢٢]
’اور انہوں نے جو اعمال کیے، ہم ان کی طرف متوجہ ہوں گے، پھر انہیں بکھرے ہوئے غبار کے ذرات بنا دیں گے۔‘[20]
اس کے برعکس، جس کے عمل میں دونوں شرطیں پوری ہوں، اس کے عمل کے بارے میں اللہ تعالیٰ فرماتا ہے:
﴿ وَمَنۡ أَحۡسَنُ قَوۡلٗا مِّمَّن دَعَآ إِلَى ٱللَّهِ وَعَمِلَ صَٰلِحٗا وَقَالَ إِنَّنِي مِنَ ٱلۡمُسۡلِمِينَ ٣٣ ﴾ [فصلت: ٣٣]
’اور دین کے اعتبار سے اس شخص سے بہتر کون ہے جس نے نیکوکار ہوتے ہوئے اپنے آپ کو مکمل طور پر اللہ کے سپرد کر دیا۔‘[21] اللہ تعالیٰ مزید فرماتا ہے:
﴿ بَلَىٰۚ مَنۡ أَسۡلَمَ وَجۡهَهُۥ لِلَّهِ وَهُوَ مُحۡسِنٞ فَلَهُۥٓ أَجۡرُهُۥ عِندَ رَبِّهِۦ وَلَا خَوۡفٌ عَلَيۡهِمۡ وَلَا هُمۡ يَحۡزَنُونَ ١١٢ ﴾ [البقرة: ١١٢]
’ہاں، جس نے اپنے آپ کو اللہ کے سپرد کر دیا اور وہ نیکوکار بھی ہو تو اس کے لیے اس کے رب کے پاس اجر ہے، اور نہ انہیں کوئی خوف ہو گا اور نہ وہ غمگین ہوں گے۔‘[22]
لہٰذا عمر رضی اللہ عنہ سے مروی حدیث ’تمام اعمال کے نتائج نیتوں پر منحصر ہیں‘ دل کے اعمال کا معیار ہے، اور عائشہ رضی اللہ عنہا سے مروی حدیث ’جس نے ایسا عمل کیا جس پر میری منظوری نہیں، وہ مردود ہے‘ اعضا و جوارح کے اعمال کا معیار ہے۔ یہ دونوں احادیث جامع مفہوم رکھتی ہیں۔ دین کے بنیادی اور فروعی مسائل اور دل اور اعضا و جوارح کے اعمال میں سے کوئی بھی ان کے دائرے سے باہر نہیں۔ مختصر یہ کہ پورا دین ان کے دائرے میں شامل ہے۔
[1]. بخاری: 62؛ مسلم: 38۔
[2]. احمد: 4/342۔
[3]. بخاری: 3771؛ مسلم: 9431۔
[4]. بخاری: 4872۔
[5]. فتح الباری: 4/1861۔
[6]. نسائی: 2/557۔
[7]. بخاری: 1521؛ مسلم: 1350۔
[8]. مسلم: 121۔
[9]. فتح الباری: 3/382۔
[10]. ترمذی: 810۔
[11]. ابن ماجہ: 2893؛ ابن حبان: 3400؛ مسند احمد: 1489۔
[12]. ابن ماجہ: 2883۔
[13]. بخاری: 1773؛ مسلم: 1394۔
[14]. صحیح الترغیب والترہیب: 1114۔
[15]. بخاری: 1863؛ مسلم: 1256۔
[16]. طبرانی، المعجم الکبیر: 11/55۔
[17]. صحیح الترغیب والترہیب: 1112۔
[18]. بخاری: 1/9؛ مسلم: 3/1515۔
[19]. مسلم: 3/344۔
[20]. فرقان: 23۔
[21]. نساء: 125۔
[22]. بقرہ: 112۔
حج، عمرہ اور زیارت
پہلا باب: حج و عمرہ کیا، کیوں اور کب؟
اسلام ہاؤس ڈاٹ کام