۱۔ سمندر یا فضا کے راستے میقات کے بالمقابل پہنچنے پر احرام باندھے بغیر ہوائی جہاز کے اترنے تک تاخیر کرنا۔ یہ نبی صلی اللہ علیہ وسلم کے فرمان کے خلاف ہے۔ رسول اللہ صلی اللہ علیہ وسلم نے فرمایا:
«هُنَّ لَهُنَّ وَلِمَنْ أَتَى عَلَيْهِنَّ مِنْ غَيْرِهِنَّ مِمَّنْ أَرَادَ الْحَجَّ وَالْعُمْرَةَ.»
’یہ مواقیت ان علاقوں کے باشندوں اور ان مقامات سے گزرنے والے ہر بیرونی حج و عمرہ کرنے والے کے لیے احرام باندھنے کی جگہیں ہیں۔‘[1]
لہٰذا ہوائی جہاز یا بحری جہاز سے آنے والے کا فرض ہے کہ میقات پہنچنے سے پہلے ہی احرام کے کپڑے پہن لے، یا احرام کے کپڑے اپنے پاس تیار رکھے تاکہ میقات پہنچتے ہی انہیں پہن سکے۔ جو شخص ہوائی جہاز میں احرام کے کپڑے پہننا بھول جائے یا اس کے لیے بیگ سے کپڑے نکالنا ممکن نہ ہو، وہ اپنے پہنے ہوئے کپڑے اتار کر ایک چادر اور ایک تہبند پہن لے۔ اگر تہبند پہننے کا موقع نہ ملے تو فی الحال پاجامہ یا پتلون ہی پہن کر ستر ڈھانپ لے۔ پھر جب موقع ملے تو پاجامہ اتار کر احرام کے کپڑے پہن لے۔ اس پر اس کی کوئی تلافی لازم نہیں ہوگی، کیونکہ نبی صلی اللہ علیہ وسلم نے فرمایا:
«مَنْ لَمْ يَجِدْ إِزَارًا فَلْيَلْبَسِ السَّرَاوِيلَ.»
’جس کے پاس تہبند نہ ہو، وہ پاجامہ پہن لے۔‘[2]
۲۔ بہت سی خواتین یہ سمجھتی ہیں کہ احرام کے لیے سیاہ، سبز یا سفید رنگ کا کوئی مخصوص لباس ہوتا ہے۔ اس کی کوئی بنیاد نہیں۔ خواتین کوئی بھی لباس پہن سکتی ہیں، البتہ وہ لباس اظہارِ زینت کا باعث نہ ہو اور نہ مردوں یا غیر مسلموں سے مشابہ ہو۔
۳۔ بہت سے لوگوں کا خیال ہے کہ احرام کے کپڑے میلے یا پھٹ جانے کے باوجود تبدیل نہیں کیے جا سکتے۔ یہ درست نہیں۔ صحیح بات یہ ہے کہ مُحرِم کے لیے احرام کے کپڑے اتارنا اور جب چاہے انہیں تبدیل کرنا جائز ہے۔
۴۔ بہت سی خواتین اپنے چہرے اور نقاب کے درمیان لکڑی یا اس جیسی کوئی چیز رکھتی ہیں تاکہ نقاب ان کے چہرے کو نہ چھوئے۔ یہ بھی ایک بے بنیاد رسم ہے۔ اسلام کے ابتدائی دور میں کسی مسلمان خاتون نے ایسا نہیں کیا؛ بلکہ غیر محرم مردوں کے سامنے آنے پر خواتین چہرے پر نقاب پہننے کے بجائے اوڑھنی لٹکا کر چہرہ چھپا لیں، اور جب غیر محرم مرد موجود نہ ہوں تو چہرہ کھلا رکھیں۔ اوڑھنی ان کے چہرے کو چھو جائے تو بھی کوئی حرج نہیں۔
۵۔ بہت سی خواتین عمرہ یا حج کی نیت کے باوجود حیض یا نفاس کی حالت میں میقات سے احرام نہیں باندھتیں۔ یہ ایک واضح غلطی ہے۔ نفاس یا حیض والی عورت کے لیے بھی میقات سے احرام باندھنا فرض ہے۔ مزید برآں عام عورتوں کی طرح، جو نفاس یا حیض میں نہ ہوں، ان کے لیے بھی غسل اور طہارت حاصل کرنے کا حکم ہے۔ نفاس اور حیض والی خواتین دوسرے تمام حج و عمرہ کرنے والوں کی طرح سارے اعمال کر سکتی ہیں، البتہ پاک ہونے تک بیت اللہ کا طواف نہیں کر سکتیں۔ کیونکہ نبی صلی اللہ علیہ وسلم نے اسماء بنت عمیس رضی اللہ عنہا سے، جب میقات پر بچہ پیدا ہونے کے بعد ان کا نفاس شروع ہوا، فرمایا:
«اغْتَسِلِى وَاسْتَثْفِرِى بِثَوْبٍ وَأَحْرِمِى.»
’غسل کرو، کپڑے سے خون روک لو اور احرام باندھ لو۔‘[3] اور جب حالتِ احرام میں عائشہ رضی اللہ عنہا کو حیض شروع ہوا تو آپ صلی اللہ علیہ وسلم نے ان سے فرمایا:
«إِنَّ هَذَا أَمْرٌ كَتَبَهُ اللَّهُ عَلَى بَنَاتِ آدَمَ فَاقْضِي مَا يَقْضِي الْحَاجُّ غَيْرَ أَنْ لاَ تَطُوفِي بِالْبَيْتِ».
’یہ ایسی چیز ہے جسے اللہ تعالیٰ نے آدم کی بیٹیوں پر لکھ دیا ہے۔ (یہ تو ہونا ہی ہے) لہٰذا تم دوسرے حاجیوں کی طرح تمام اعمال کر سکتی ہو، صرف بیت اللہ کا طواف نہ کرنا۔‘[4]
۶۔ احرام کے وقت دو رکعت نماز پڑھنے کو واجب سمجھنا۔
۷۔ بہت سے لوگ سمجھتے ہیں کہ احرام کے کپڑے پہنتے ہی احرام میں ممنوع کاموں سے بچنا لازم ہو جاتا ہے؛ لیکن صحیح بات یہ ہے کہ جب بندہ احرام باندھنے کی نیت کرتا ہے، تبھی وہ کام ممنوع ہوتے ہیں، خواہ وہ احرام کے کپڑے اس سے پہلے پہنے یا بعد میں۔
۸۔ بہت سے لوگ بچوں اور کم عمر لڑکوں کو احرام باندھنے کے بعد تھکا ہوا دیکھ کر ان کا حج ختم کروا دیتے ہیں۔ یہ بھی غلط ہے۔ بلکہ بچے کے سرپرست کو چاہیے کہ حج کے اعمال بخوبی مکمل کرنے میں اسے سہارا دے اور اس کی مدد کرے۔ جو اعمال وہ ادا نہ کر سکے، سرپرست اس کی طرف سے انہیں ادا کرے۔
۹۔ اجتماعی آواز میں تلبیہ پڑھنا شریعت سے ثابت نہیں۔ کیونکہ تلبیہ ایک ایسی عبادت ہے جسے صرف اسی طریقے سے ادا کیا جا سکتا ہے جس طرح وہ منقول ہے۔ اور نبی صلی اللہ علیہ وسلم یا آپ کے صحابۂ کرام رضی اللہ عنہم سے اجتماعی آواز میں تلبیہ پڑھنا ثابت نہیں۔
۱۰۔ بے فائدہ باتوں یا کاموں اور ایسے کاموں میں مشغول ہو کر تلبیہ پڑھنا چھوڑ دینا جنہیں بعد میں بھی کیا جا سکتا ہے۔ اس سے بھی زیادہ سنگین بات یہ ہے کہ غیبت، چغلی، گانے یا کسی بے فائدہ کام میں قیمتی وقت ضائع کیا جائے۔
حواشی
[1]۔ بخاری: ۱۵۲۴، مسلم: ۱۱۸۱۔
[2]۔ بخاری: ۱۸۴۳، مسلم: ۱۱۷۸۔
[3]۔ مذکورہ بالا۔
[4]۔ بخاری: ۲۹۴؛ مسلم: ۱۲۱۱۔