مختلف احادیث میں ہدی ذبح کرنے کی فضیلت بیان ہوئی ہے۔ مثلاً،
وہ حج سب سے افضل ہے جس میں ہدی یا قربانی کے جانور کا خون بہایا جائے۔ رسول اللہ صلی اللہ علیہ وسلم سے پوچھا گیا کہ کون سا حج سب سے افضل ہے؟ جواب میں آپ نے فرمایا،
الْعَجُّ ، وَالثَّجُّ
’تلبیہ بلند آواز سے کہنا اور جانور کا خون بہانا۔‘[1]
جانور کا خون بہانے کا ثواب اللہ کے ہاں محفوظ رہے گا۔ حدیث میں آیا ہے، رسول اللہ صلی اللہ علیہ وسلم فرماتے ہیں،
«وَأَمَّا نَحْرُكَ ، فَمَذْخُورٌ لَكَ عِنْدَ رَبِّكَ»
’اور تمہارا جانور کا خون بہانا، وہ اللہ کے ہاں تمہارے لیے ذخیرہ رہے گا۔‘[2]
رسول اللہ صلی اللہ علیہ وسلم نے خود بھی جانور ذبح کیے ہیں۔ حدیث میں آیا ہے،
«وَنَحَرَ النَّبِى صلى الله عليه وسلم بِيَدِهِ سَبْعَ بُدْنٍ قِيَامًا».
’نبی صلی اللہ علیہ وسلم نے اپنے ہاتھ سے سات اونٹوں کو کھڑی حالت میں نحر (ذبح) کیا۔‘[3]
لہٰذا جانور ذبح کرنا ایک افضل عمل ہے۔ رسول اللہ صلی اللہ علیہ وسلم نے خود بھی ایسا کیا اور اس کی ترغیب بھی دی۔
[1]۔ ترمذی: ۸۲۷۔
[2]۔ مصنف عبد الرزاق: ۵/۱۶۔
[3]۔ بخاری: ۱۷۱۴۔ دوسری روایت کے مطابق آپ نے ۶۳ ہدی کے جانور اپنے ہاتھ سے ذبح کیے۔ مسلم: ۱۲۱۷۔